O Concello de Salvaterra de Miño ven de adxudicar por un importe de máis de 100.000€ a pavimentación de viais no Polígono Industrial Chan da Ponte, en Salvaterra de Miño ,a través dunha subvención concedida pola Consellería de Economía, Emprego e Industria para melloras de parques industriais.
Con esta acción o Grupo de Goberno local quere realizar melloras no seu polígono, que a día de hoxe da traballo a máis de 500 persoas e que necesita unha obra de mellora nos seus viais. Por ese motivo o Concello acolleuse a orde da Xunta para a habilitación e mellora de infraestruturas nos parques empresariais de Galicia que financiará a obra por un importe de 80.255,85, os outros 20.063,96€ cofináncianse a través do Plan Concellos.
O Polígono Industrial de Chan da Ponte, que se puxo en funcionamento no ano 1999, conta con 275.000 metros cadrados de superficie e unha superficie neta industrial de 156.111 m2. Os viais interiores teñen un nivel de deterioro severo, provocado polo intenso tráfico que circula por eles e o paso do tempo.
O proxecto recolle a pavimentación de varios viais dentro do Polígono Industrial, viais que necesitan unha renovación na rodadura, xa que o firme existente encontrase deformado e nun estado de deterioro considerable. A actuación principal de pavimentación executarase mediante estendido e compactado dunha capa de rodadura de 5 cm de espesor de mestura bituminosa en quente tipo AC16 Surf 50/70D, ademais fresaranse zonas concretas nas que non se pode subir a cota actual do vial, 1860 m2 de fresado firme e máis de 8.600 m2 de capa de rodadura.
As obras teñen un prazo de execución de 1 mes.