A FEDERACIÓN ESPAÑOLA DE MUNICIPIOS E PROVINCIAS VEN DE COMUNICAR AO CONCELLO DE SALVATERRA DE MIÑO A CONCESIÓN DUNHA AXUDA ECONÓMICA DESTINADA ÁS ENTIDADES LOCAIS PARA A REALIZACIÓN DE ACTUACIÓNS RELACIONADAS COA MEMORIA DEMOCRÁTICA.

O Concello de Salvaterra de Miño solicitou a finais do ano 2025 a axuda económica destinada ás Entidades Locais para a realización de actuacións de recuperación de Memoria Democrática 2025-26 para levar a cabo a Exhumación da fosa de Salvaterra, que acaba de ser incluída no “VI Plan de Recuperación de Memoria Democrática 2025- 2026” cunha axuda de 7.500 euros. Esta proposta de actuación nace dunha reunión mantida entre a Alcaldesa de Salvaterra, Marta Valcárcel, e a Comisión pola Recuperación da Memoria Histórica do Baixo Miño – Condado – Louriña. A investigación e o traballo realizado pola Comisión céntrase na busca dos restos de 3 persoas, Bernardo Bernárdez Martínez, Delfín Rey Sánchez e un descoñecido que segundo consta nas partidas de defunción obtidas no xulgado de paz municipal recibiron sepultura no cemiterio de Salvaterra.